ក្រុមហ៊ុនហ្គោលវែលចែករំលែកទស្សនវិស័យទីផ្សារសម្រាប់ឆ្នាំ ២០២០ នៅគ.ម.ក
- 2020-02-21
នៅថ្ងៃទី ២១ ខែកុម្ភៈ ឆ្នាំ ២០២០ គណៈកម្មការមូលបត្រកម្ពុជា (គ.ម.ក) បានបើកវគ្គបណ្តុះបណ្តាលជំនាញវិជ្ជាជីវៈមួយ។ ក្នុងនាមជាក្រុមហ៊ុនឈ្មួញជើងសាឧបករណ៍និស្សន្ទឈានមុខគេនៅកម្ពុជា ក្រុមហ៊ុនហ្គោលវែលត្រូវបានអញ្ជើញឲ្យចូលរួមជាភ្ញៀវកិត្តិយស និងចែករំលែកបទពិសោធន៍ផ្នែកវិនិយោគ។
ឯកឧត្តម ស៊ូសុជាតិ អគ្គនាយកគ.ម.ក បានថ្លែងសុន្ទរកថាបើកកម្មវិធី និងថ្លែងអំណរគុណផងដែរដល់ថ្នាក់ដឹកនាំនៃក្រុមហ៊ុនហ្គោលវែលទាំងអស់ ព្រមទាំងបានលើកទឹកចិត្តឲ្យអ្នកចូលរួមទាំងអស់ចែករំលែក និងប្រើប្រាស់នូវអ្វីដែលខ្លួនបានរៀន។ ឯកឧត្តមជឿជាក់ថា វគ្គបណ្តុះបណ្តាលនេះគឺជាវិធីសាស្ត្រដ៏សំខាន់មួយសម្រាប់ប្រជាជនកម្ពុជាក្នុងការស្វែងយល់ពីទីផ្សារហិរញ្ញវត្ថុ ដូច្នេះការបណ្តុះបណ្តាលផ្សេងទៀតនឹងត្រូវរៀបចំឡើងនាថ្ងៃខាងមុខ ដើម្បីបង្កើតឱកាសរៀនសូត្រសម្រាប់យើងគ្រប់គ្នា។
លោក George Black ប្រធានទីប្រឹក្សាវិនិយោគនៃក្រុមហ៊ុនហ្គោលវែល និងលោក Naoto Arase នាយកផ្នែកបច្ចេកវិទ្យាហិរញ្ញវត្ថុ បានធ្វើបទបង្ហាញយ៉ាងក្បោះក្បាយក្នុងវគ្គបណ្តុះបណ្តាល ស្តីពីចំណេះដឹង និងជំនាញនៃទីផ្សារហិរញ្ញវត្ថុ និងចែករំលែកជាមួយអ្នកចូលរួមអំពីនិន្នាការទីផ្សារ ផលិតផល និងបច្ចេកទេសហិរញ្ញវត្ថុ។
ក្រៅពីការពន្យល់ចំណេះដឹងខាងទ្រឹស្តី លោក George និងលោក Naoto ក៏បានធ្វើលំហាត់វិភាគនិន្នាការជួញដូររូបិយប័ណ្ណនៅនឹងកន្លែងផងដែរ។ នេះក៏ជាផ្នែកមួយដែលផ្តល់ភាពចាប់អារម្មណ៍ និងភាពរំភើបបំផុតសម្រាប់អ្នកចូលរួមទាំងអស់ក្នុងវគ្គបណ្តុះបណ្តាលនេះ ដោយអ្នកចូលរួមនីមួយៗបានចូលរួមយ៉ាងសកម្ម ដោយអនុវត្តនូវយុទ្ធសាស្ត្រវិភាគដែលបានសិក្សា។
វគ្គបណ្តុះបណ្តាលនេះបានផ្តល់នូវបទពិសោធន៍ដែលមិនអាចបំភ្លេចបានសម្រាប់អ្នកចូលរួមទាំងអស់។ ជាមួយគ្នានេះដែរ ឯកឧត្តម ស៊ូសុជាតិ អគ្គនាយកគ.ម.ក ក៏បានទទួលស្គាល់ និងអបអរសាទរចំពោះវគ្គបណ្តុះបណ្តាលនេះផងដែរ ហើយនៅថ្ងៃខាងមុខ គ.ម.ក នឹងបង្កើតវគ្គបណ្តុះបណ្តាលបន្ថែមទៀត ដើម្បីនាំមកនូវចំណេះដឹង និងសេចក្តីរីករាយដល់យើងគ្រប់គ្នា។