ក្រុមហ៊ុនហ្គោលវែលចូលរួមជាវាគ្មិនកិត្តិយសក្នុងវេទិកាពិភាក្សា “និន្នាការអភិវឌ្ឍន៍នៃវិស័យឧបករណ៍និស្សន្ទនៅកម្ពុជា”
- 2018-06-15
បន្ទាប់ពីទទួលបានលទ្ធផលយ៉ាងលេចធ្លោក្នុងពិព័រណ៍នៅ Cyprus និងហុងកុង ក្នុងខែឧសភា ឆ្នាំ ២០១៨ កន្លងមក ក្រុមហ៊ុនហ្គោលវែលមានកិត្តិយសយ៉ាងខ្លាំងដែលត្រូវបានអញ្ជើញឲ្យធ្វើជាវាគ្មិនកិត្តិយសក្នុងវេទិកាពិភាក្សា ក្រោមប្រធានបទ “និន្នាការអភិវឌ្ឍន៍នៃវិស័យឧបករណ៍និស្សន្ទនៅកម្ពុជា” ក្នុងខែនេះ។ វេទិកានេះត្រូវបានរៀបចំឡើងនៅថ្ងៃទី ១៥ ខែមិថុនា ឆ្នាំ២០១៨ ឯសណ្ឋាគារសូហ្វីតែល ភូគីត្រា ភ្នំពេញ ដោយគណៈកម្មការមូលបត្រកម្ពុជា ក្នុងគោលបំណងផ្សព្វផ្សាយការអប់រំ និងផ្តល់ព័ត៌មានពាក់ព័ន្ធក្នុងវិស័យនេះសម្រាប់វិនិយោគិនកម្ពុជា។
ក្នុងវេទិកានេះ ឯកឧត្តម ស៊ូ សុជាតិ អគ្គនាយកនៃគណៈកម្មការមូលបត្រកម្ពុជា និងលោក Stephanus Paulus Lumintang នាយកប្រតិបត្តិនៃផ្សារហ៊ុន Jakarta Futures Exchange បានឡើងធ្វើបទបង្ហាញសំខាន់ៗក្នុងកម្មវិធី។ ជាមួយគ្នានេះដែរ លោក Neph Vargas នាយកផ្នែកទីផ្សាររបស់ក្រុមហ៊ុនហ្គោលវែលបានឡើងចែករំលែកពីគុណតម្លៃនៃទីផ្សារឌីជីថលនៅក្នុងវិស័យហិរញ្ញវត្ថុ ហើយលោក ជា ពន្លក នាយកប្រតិបត្តិនៃក្រុមហ៊ុនក៏បានចូលរួមបទពិភាក្សាឱកាសវិនិយោគក្នុងស្រុក ជាមួយនឹងវិនិយោគិនបរទេសជាច្រើនរូបផងដែរ ដោយបានផ្តល់ជូនភ្ញៀវកិត្តិយសទាំងអស់នូវព័ត៌មានទីផ្សារយ៉ាងសំខាន់។
នៅចុងបញ្ចប់នៃកម្មវិធី គណៈកម្មការមូលបត្រកម្ពុជាបានប្រគល់ពានរង្វាន់អនុស្សាវរីយ៍ជូនដល់វាគ្មិនកិត្តិយស ដើម្បីជាការអរគុណសម្រាប់ការចូលរួមចំណែករបស់វាគ្មិន និងជាការបញ្ចប់កម្មវិធីប្រកបដោយភាពជោគជ័យសម្រាប់វេទិកាទាំងមូល។ ឆ្លៀតក្នុងឱកាសដ៏មានតម្លៃនេះ អ្នកជំនាញនិងស្ថាប័នមកពីវិស័យនានា បានបង្កើតសម្ព័ន្ធភាពយ៉ាងល្អជាមួយនឹងភ្ញៀវកិត្តិយស និងវាគ្មិននៅថ្ងៃនោះផងដែរ ។
ក្រុមហ៊ុនហ្គោលវែលប្តេជ្ញាបង្កើនការយល់ដឹងអំពីទីផ្សារឧបករណ៍និស្សន្ទ ក៏ដូចជានិន្នាការអភិវឌ្ឍន៍របស់វិស័យឧបករណ៍និស្សន្ទសម្រាប់ទាំងប្រជាពលរដ្ឋកម្ពុជា និងវិនិយោគិនអន្តរជាតិ។ នាថ្ងៃអនាគត ក្រុមហ៊ុនហ្គោលវែលនឹងរៀបចំពិព័រណ៍អន្ដរជាតិបន្ថែមទៀត ដើម្បីបង្ហាញពីឱកាសវិនិយោគដ៏អស្ចារ្យរបស់ប្រទេសកម្ពុជា។
