ហ្គោលវែល ក្រុមហ៊ុនឈ្មួញជើងសាឧបករណ៍និស្សន្ទលំដាប់ថ្នាក់ទី៣នៅកម្ពុជា
- 2020-04-15
យោងតាមរបាយការណ៍ផ្លូវការដែលចេញដោយគណៈកម្មការមូលបត្រកម្ពុជា (គ.ម.ក) បានឲ្យដឹងថាក្រុមហ៊ុនហ្គោលវែលបានជាប់លំដាប់ថ្នាក់ទី៣ ក្នុងចំណោមក្រុមហ៊ុនឈ្មួញជើងសាឧបករណ៍និស្សន្ទដែលមានទំហំជួញដូរច្រើនបំផុតក្នុងត្រីមាសទី ១ ឆ្នាំ២០២០ នេះ។
ការជាប់ចំណាត់ថ្នាក់នេះ បានបង្ហាញពីការគាំទ្រយ៉ាងខ្លាំងរបស់អតិថិជនចំពោះក្រុមហ៊ុនហ្គោលវែល ព្រមទាំងបានបង្ហាញផងដែរនូវភាពរឹងមាំរបស់ទីផ្សារជួញដូរឧបករណ៍និស្សន្ទនៅក្នុងប្រទេសកម្ពុជា។
លោក Peter Cruz នាយកប្រតិបត្តិជាន់ខ្ពស់នៃក្រុមហ៊ុនហ្គោលវែល បានមានប្រសាសន៍ថា “យើងមានកិត្តិយសណាស់ដែលបានក្លាយជាក្រុមហ៊ុនឈ្មួញជើងសាឧបករណ៍និស្សន្ទឈានមុខគេនៅកម្ពុជា។ នេះបង្ហាញថាក្រុមហ៊ុនបាននិងកំពុងដើរតួនាទីយ៉ាងសំខាន់នៅក្នុងទីផ្សារឧបករណ៍និស្សន្ទ។ តាំងពីពេលបង្កើតក្រុមហ៊ុនមក យើងបានប្រើប្រាស់ស្មារតី និងធនធានជាច្រើន ដើម្បីធ្វើឲ្យគុណភាពផលិតផល និងសេវាកម្មរបស់ក្រុមហ៊ុនកាន់តែមានភាពប្រសើរឡើង ព្រមទាំងពង្រឹងការបណ្តុះបណ្តាលអតិថិជនជុំវិញពិភពលោកនូវចំណេះដឹង និងជំនាញនៃការជួញដូរ។ ដូចនេះ សមិទ្ធផលដ៏គាប់ប្រសើរនេះ បង្ហាញថា មានតែការស្វែងរកភាពជំនាញឥតឈប់ឈរ និងការប្រកាន់ខ្ជាប់នូវគោលការណ៍ទេ ទើបយើងអាចទទួលបានជ័យជំនះ និងរីករាយជាមួយនឹងផ្លាផ្កាដ៏ភាពសំបូរបែបនេះ។
កាលពី ៥ ឆ្នាំមុន ដោយសារប្រជាពលរដ្ឋកម្ពុជាមិនទាន់យល់ដឹងពីទីផ្សារឧបករណ៍និស្សន្ទដែលស្ថិតក្រោមការត្រួតពិនិត្យរបស់រដ្ឋាភិបាល យើងមានភាពលំបាកណាស់ក្នុងការទទួលបាននូវទំហំជួញដូរជាក់លាក់មួយ។ ទោះជាយ៉ាងណាក៏ដោយ តាមរយៈការរៀបចំវគ្គបណ្តុះបណ្តាលពាក់ព័ន្ធនឹងទីផ្សារឧបករណ៍និស្សន្ទជាប្រចាំ រួមនឹងក្រុមការងារដែលមានជំនាញនិងវិជ្ជាជីវៈច្បាស់លាស់ ដែលតែងផ្តល់ការគាំទ្រយ៉ាងពេញទំហឹងដល់វិនិយោគិនគ្រប់រូបនោះ បានធ្វើឲ្យទំហំជួញដូររបស់ក្រុមហ៊ុនហ្គោលវែលបានឈានដល់ចំណុចកំពូលម្តងហើយម្តងទៀត។
លោក Peter Cruz បានបន្ថែមទៀតថា “ជារួម ទំហំជួញដូរសរុបរបស់យើងនៅតែបន្តកើនឡើងជារៀងរាល់ខែ។ នេះមានន័យថាអ្នកចូលរួមក្នុងទីផ្សារ ដូចជាពាណិជ្ជករ និងវិនិយោគិនកាន់តែស្គាល់ច្បាស់ពីទីផ្សារឧបករណ៍និស្សន្ទ និងបានចូលរួមយ៉ាងសកម្មនៅក្នុងវិស័យនេះ។ នេះជាសញ្ញាណវិជ្ជមានសម្រាប់វិស័យទាំងមូល ដែលទន្ទឹមនឹងនេះក៏បានបង្ហាញផងដែរថា ការងាររបស់យើងកំពុងចូលរួមជួយជំរុញការអភិវឌ្ឍសេដ្ឋកិច្ចកាន់តែខ្លាំងឡើង” ។
នៅដើមឆ្នាំ ២០១៩ គ.ម.ក បានចាប់ផ្តើមចេញសេចក្តីប្រកាសព័ត៌មានស្តីពីការជួញដូរឧបករណ៍និស្សន្ទប្រចាំខែ ក្នុងគោលបំណងបង្កើនការត្រួតពិនិត្យនិងតម្លាភាពទីផ្សារ ព្រមទាំងធ្វើការផ្តល់ជូនវិនិយោគិននិងសាធារណជននូវព័ត៌មានថ្មីៗ សំខាន់ៗ ទាក់ទងនឹងក្រុមហ៊ុនឈ្មួញជើងសាឧបករណ៍និស្សន្ទ។